हेमपात्रगतं दोभ्या॑मादधानः पयश्चरुम्।
अनुप्रवेशादाद्यस्य पुंसस्तेनापि दुर्वहम् ॥५१॥

प्राजापत्योपनीतं तदन्नं प्रत्यग्रहीन्नृपः।
वृषेव पयसां सारमाविष्कृतमुदन्वता॥५२॥

अनेन कथिता राज्ञो गुणास्तस्यान्यदुर्लभाः।
प्रसूति चकमे तस्मिस्त्रैलोक्यप्रभवोऽपि यत्॥५३॥

स तेजो वैष्णवं पत्न्योविभेजे चरुसंज्ञितम्॥
द्यावापृथिव्योः प्रत्यग्रमहर्पतिरिवातपम्॥५४॥

अर्चिता तस्य कौसल्या प्रिया केकयवंशजा।
अतः संभावितां ताभ्यां सुमित्रामैच्छदीश्वरः॥५५॥

ते बहुज्ञस्य चित्तज्ञे पत्न्यौ पत्युर्महीक्षितः।
चरोरर्धार्धभागाभ्यां तामयोजयतामुभे ॥५६॥

सा हि प्रणयवत्यासीत् सपत्न्योरुभयोरपि।
भ्रमरी वारणस्येव मदनिस्यन्दरेखयोः॥५७॥

ताभिर्गर्भः प्रजाभूत्यै दध्रे देवांशसंभवः।
सौरीभिरिव नाडीभिरमृताख्याभिरम्मयः ॥५८॥

सममापन्नसत्त्वास्ता रेजुरापाण्डुरत्विषः।
अन्तर्गतफलारम्भाः सस्यानामिव संपदः॥५९॥

गुप्तं ददृशुरात्मानं सर्वाः स्वप्नेषु वामनैः।
१जलजासि-गदा-शार्ङ्ग-चक्र-लाञ्छित-मूर्तिभिः॥६०॥
------------------
१. जलजं शङ्खः द्र. र ७।६३

...Prev | Next...